45 ದಿನಗಳ ಕಾಲ ಗೂಡಿನಲ್ಲಿ ಬೆಚ್ಚಗಿದ್ದ ಆಮೆ ಮರಿಗಳು ವಿಶಾಲವಾದ ಪ್ರಪಂಚ ನೋಡಲು ಭಾನುವಾರ ಸಮುದ್ರಕ್ಕಿಳಿದಿವೆ. ಕುಮಟಾ ಗಂಗೆಕೊಳ್ಳದ ಕಡಲತೀರದಲ್ಲಿ ಶಾಲಾ ಮಕ್ಕಳು ಆಮೆಗಳನ್ನು ಹಿಡಿದು ನೀರಿಗೆ ಬಿಟ್ಟರು.
ಡಿಸೆಂಬರಿನಿoದ ಮಾರ್ಚ ಅವಧಿ ಕಡಲ ಆಮೆಗಳ ಪಾಲಿಗೆ ಸಂತಾನೋತ್ಪತ್ತಿ ಕಾಲ. ಈ ಅವಧಿಯಲ್ಲಿ ಕಡಲ ತೀರಕ್ಕೆ ಬರುವ ಆಮೆಗಳು ಅಲ್ಲಿ ಮೊಟ್ಟೆಯಿಟ್ಟು ಮರಿ ಸಂರಕ್ಷಿಸುವ ಪ್ರಯತ್ನ ನಡೆಸುತ್ತದೆ. ಆದರೆ, ನಾಯಿ ಹಾಗೂ ಮನುಷ್ಯರ ಅತಿ ಆಸೆಗೆ ಈ ಮೊಟ್ಟೆ ಹಾಳಾಗುವ ಸಾಧ್ಯತೆ ಹೆಚ್ಚಿದೆ. ಈ ಹಿನ್ನಲೆ ಅರಣ್ಯ ಇಲಾಖೆ ಆಮೆ ಮೊಟ್ಟೆ ರಕ್ಷಣೆಗೆ ವಿಶೇಷ ಪ್ರಯತ್ನ ನಡೆಸುತ್ತಿದೆ.
ಆಮೆ ಮೊಟ್ಟೆಯಿಟ್ಟಿರುವ ಸುದ್ದಿ ಗೊತ್ತಾದಲ್ಲಿ ಅರಣ್ಯ ಸಿಬ್ಬಂದಿ ಅದನ್ನು ರಕ್ಷಿಸುತ್ತಾರೆ. 45 ದಿನಗಳ ಕಾಲ ಜೋಪಾನ ಮಾಡಿ ಮೊಟ್ಟೆಯಿಂದ ಮರಿ ಹೊರ ಬಂದ ನಂತರ ಅದನ್ನು ಕಡಲಿಗೆ ಬಿಡುತ್ತಾರೆ. ಈ ವರ್ಷ ಕುಮಟಾ ಭಾಗದಲ್ಲಿ 50 ಗೂಡು ದೊರೆತಿದ್ದು, ಅಲ್ಲಿದ್ದ 4756 ಮೊಟ್ಟೆಗಳನ್ನು ಸಂರಕ್ಷಿಸಲಾಗಿದೆ.
ಭಾನುವಾರ ಆ ಪೈಕಿ 80 ಆಮೆಗಳು ಮೊಟ್ಟೆಯಿಂದ ಹೊರ ಬಂದಿವೆ. ಗಂಗೆಕೊಳ್ಳದ ಕಡಲತೀರದಲ್ಲಿ ಶಾಲಾ ಮಕ್ಕಳು ಆ ಮರಿಗಳನ್ನು ಸಮುದ್ರಕ್ಕೆ ಬಿಟ್ಟು ಖುಷಿಪಟ್ಟರು.
