Kiran Reporter Haveri
ಉತ್ತರ ಕನ್ನಡ ಪ್ರವಾಸೋದ್ಯಮಕ್ಕೆ ಐತಿಹಾಸಿಕ ಮೈಲುಗಲ್ಲು ಎಂದು ಭಾವಿಸಲಾಗಿದ್ದ `ಟುಪಲೇವ್ 142-ಎಂ’ ಯುದ್ಧ ವಿಮಾನ ಸಾರ್ವಜನಿಕ ವೀಕ್ಷಣೆಗೆ ಲಭ್ಯವಾದ ಕೆಲವೇ ಕ್ಷಣದಲ್ಲಿ ಮುಕ್ತ ಪ್ರವೇಶಕ್ಕೆ ತಡೆ ಒಡ್ಡಲಾಗಿದೆ.
ಕಡಲತೀರದಲ್ಲಿ ಯುದ್ಧನೌಕೆ ಹಾಗೂ ಯುದ್ಧವಿಮಾನ ವಸ್ತು ಸಂಗ್ರಹಾಲಯ ಒಟ್ಟಿಗೆ ಇರುವ ಅಪರೂಪದ ತಾಣ ಕಾರವಾರವಾಗಿದ್ದು, ಇದನ್ನು ನೋಡಲು ಬರುವವರಿಗೆ ನಿರಾಸೆಯಾಗಿದೆ. 2017ರಲ್ಲಿ ನಿವೃತ್ತಿ ಹೊಂದಿದ ಈ ಯುದ್ಧ ವಿಮಾನ 53.6 ಮೀ ಉದ್ದ ಮತ್ತು 35 ಮೀ ಅಗಲವಿದೆ. `ಐ ಎನ್ ಎಸ್ ಚಪಲ್’ ಯುದ್ಧನೌಕೆ ಪಕ್ಕದಲ್ಲಿ `ಟುಪಲೇವ್ 142-ಎಂ’ ಯುದ್ಧ ವಿಮಾನವನ್ನು ಇರಿಸಿದ್ದರಿಂದ ಹೆದ್ದಾರಿ ಪ್ರಯಾಣಿಸುವ ಅನೇಕರು ಇದರ ವೀಕ್ಷಣೆಗೆ ಆಗಮಿಸುತ್ತಿದ್ದಾರೆ. ಆದರೆ, ಯುದ್ಧ ವಿಮಾನದ ಬಾಗಿಲು ಮುಚ್ಚಿರುವುದರಿಂದ ನಿರಾಸೆಯಿಂದ ಮರಳುತ್ತಿದ್ದಾರೆ.
ತಮಿಳುನಾಡಿನ ಅರಕ್ಕೋಣದಲ್ಲಿರುವ ರಾಜೋಲಿ ನೌಕಾನೆಲೆಯಿಂದ ಕಾರವಾರ ಕಡಲತೀರಕ್ಕೆ 9 ತಿಂಗಳ ಹಿಂದೆ ಈ ವಿಮಾನ ತರಲಾಗಿದೆ. ಇದರ ಸಾಗಾಟ ಹಾಗೂ ಮರುಜೋಡಣೆಯ ಹೊಣೆ ನೌಕಾನೆಲೆಯದ್ದಾಗಿದ್ದು, ವಿಮಾನದಲ್ಲಿ ಹವಾನಿಯಂತ್ರಕ (ಎಸಿ) ಅಳವಡಿಸುವ ಕಾರ್ಯ ಬಾಕಿ ಇರುವ ಹಿನ್ನಲೆ ಉದ್ಘಾಟನೆ ಆದ ಕೆಲವೇ ಕ್ಷಣದಲ್ಲಿ ಅದರ ಪ್ರವೇಶಕ್ಕೆ ತಡೆ ಒಡ್ಡಲಾಗಿದೆ. ಇದರ ನಿರ್ವಹಣೆಯ ಹೊಣೆಯನ್ನು ಪ್ರವಾಸೋದ್ಯಮ ಇಲಾಖೆವಹಿಸಿಕೊಂಡಿದೆ.
