ಕಾರವಾರ: ಗೋವಾದ ಟಿಸ್ಕ್ ಉಸ್ಗಾವೊದಲ್ಲಿ ಬಾಲ್ಯ ವಿವಾಹ ನಡೆದಿದೆ. ಕಾರವಾರದ ಬಾಲಕಿಯನ್ನು ಗೋವಾಗೆ ಕರೆದೊಯ್ದು ಮದುವೆ ಮಾಡಿಸಲಾಗಿದೆ. ಈ ಬಗ್ಗೆ ನಾಲ್ಕು ಜನರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡ ಗೋವಾದ ಪೋಂಡಾ ಪೊಲೀಸರು ವ್ಯಕ್ತಿಯೊಬ್ಬನನ್ನು ಬಂಧಿಸಿದ್ದಾರೆ.
ಎoಟು ದಿನಗಳ ಹಿಂದೆಯೇ ಈ ವಿವಾಹ ನಡೆದಿದ್ದು, ಪೊಲೀಸ್ ಪ್ರಕರಣದ ನಂತರ ಬೆಳಕಿಗೆ ಬಂದಿದೆ. ಕಾರವಾರದ ಬಾಲಕಿಯನ್ನು ಪುಸಲಾಯಿಸಿ ಗೋವಾಗೆ ಕರೆದೊಯ್ದು, ಈಗಾಗಲೇ ಒಂದು ಮದುವೆ ಆದ ಯುವಕ ಆಕೆಯನ್ನು ವರಿಸಿದ್ದಾನೆ. ತನ್ನ ಪತಿಗೆ ಮೊದಲೇ ಮದುವೆ ಆದ ಬಗ್ಗೆ ಬಾಲಕಿ ಪಾಲಕರಿಗೆ ತಿಳಿಸಿದ್ದು, ಸಿಟ್ಟಾದ ಆಕೆಯ ಪಾಲಕರು ಬಾಲಕಿಯನ್ನು ಕಾರವಾರಕ್ಕೆ ಕರೆತಂದಿದ್ದಾರೆ.
ಈ ಬಗ್ಗೆ ಗುಸು ಗುಸು ಸುದ್ದಿ ಕೇಳಿದ ಆ ಭಾಗದ ಅಂಗನವಾಡಿ ಕಾರ್ಯಕರ್ತೆ ಪೊಲೀಸರಿಗೆ ವಿಷಯ ಮುಟ್ಟಿಸಿದರು. ಪೊಲೀಸರು ಗೋವಾ ಪೊಲೀಸರಿಗೆ ಫೋನ್ ಮಾಡಿ ವಿಷಯ ಖಚಿತಪಡಿಸಿಕೊಂಡರು. ಗೋವಾದ ಪೊಂಡಾ ಪೊಲೀಸರು ಪ್ರಕರಣ ದಾಖಲಿಸಿ ಗೋವಾದಲ್ಲಿಯೇ ಇದ್ದ ಚೆಂಬಲ್ (28) ಎಂಬಾತನನ್ನು ಬಂಧಿಸಿದರು. ಈ ಮದುವೆಗಾಗಿ ಒತ್ತಡ ಹೇರಿದ್ದ ಹಾವೇರಿ ಹಾಗೂ ಕಾರವಾರ ಮೂಲದ ವ್ಯಕ್ತಿಗಳ ವಿರುದ್ಧವೂ ಗೋವಾ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
