ಸಿದ್ದಾಪುರ: 27 ವರ್ಷದ ಚಂದ್ರಶೇಖರ ರಾಮಾ ಭಟ್ಟ ಹಾಗೂ 27 ವರ್ಷದ ಉಮಾಪತಿ ಮಾಬ್ಲೇಶ್ವರ ಭಟ್ಟ ನಡುವೆ ಹೊಡೆದಾಟ ನಡೆದಿದೆ. ಈ ಹೊಡೆದಾಟದಲ್ಲಿ ಚಂದ್ರಶೇಖರ್ ಅವರನ್ನು ಉಮಾಪತಿ ಹಲ್ಲಿನಿಂದ ಕಚ್ಚಿ ಗಾಯಗೊಳಿಸಿದ ಬಗ್ಗೆ ಪೊಲೀಸ್ ಪ್ರಕರಣ ದಾಖಲಾಗಿದೆ.
ಚಿಟ್ನಳ್ಳಿ ಬಿದ್ರಕಾನಿನ ಚಂದ್ರಶೇಖರ್ ಭಟ್ಟರು ಅ. 5ರ ಸಂಜೆ ತಮ್ಮ ಮಗ ಪ್ರಶಾಂತನ ತೋಟದಲ್ಲಿ ಅಡಿಕೆ ಗಿಡ ನೆಟ್ಟು ಹುಲ್ಲು ತರಲು ಬೆಟ್ಟಕ್ಕೆ ಹೋಗಿದ್ದರು. ಆಗ, ಜೋರಾಗಿ ಮಳೆ ಬಂದಿದ್ದು, ಅಲ್ಲಿನ ಹಳ್ಳಕ್ಕೆ ಇದ್ದ ಕಾಲು ಸಂಕ ಕೊಚ್ಚಿ ಹೋಗಿದೆ. ಮನೆಗೆ ಮರಳಲು ದಾರಿ ಇಲ್ಲದ ಕಾರಣ ಪಕ್ಕದ ತೋಟದಿಂದ ಅವರು ಹುಲ್ಲಿನ ಕಟ್ಟು ಹೊತ್ತು ಮನೆಯತ್ತ ಬಂದಿದ್ದಾರೆ. ಆಗ, ಅಲ್ಲಿಗೆ ಬಂದ ಉಮಾಪತಿ ಭಟ್ಟರು `ಈ ದಾರಿಯಲ್ಲಿ ಓಡಾಡಬೇಡ’ ಎಂದು ಹೇಳಿದ್ದಾರೆ. `ಹಳ್ಳ ದಾಡಿ ಬರುವುದು ಕಷ್ಟವಾಗಿದ್ದರಿಂದ ಈ ದಾರಿಯಲ್ಲಿ ಬಂದೆ’ ಎಂದು ಚಂದ್ರಶೇಖರ ಭಟ್ಟರು ಹೇಳಿದಾಗ ಮಾತಿಗೆ ಮಾತು ಬೆಳೆದಿದೆ. ಆಗ, ಉಮಾಪತಿ ಭಟ್ಟರು ಕೈಯಲ್ಲಿ ಕತ್ತಿ ಹಿಡಿದು ಅದರಿಂದ ಹಲ್ಲೆ ಮಾಡಲು ಬಂದಿದ್ದು, ಅಲ್ಲಿಯೇ ಇದ್ದ ಪ್ರಶಾಂತ ಭಟ್ಟರು ಇದನ್ನು ತಪ್ಪಿಸಿದ್ದಾರೆ. ಆಗ ಉಮಾಪತಿ ಭಟ್ಟರು ಸಿಟ್ಟಿನಿಂದ ಚಂದ್ರಶೇಖರ ಭಟ್ಟರ ಕೈ ಹಿಡಿದು ಕಚ್ಚಿದ್ದಾರೆ. ಜೊತೆಗೆ ಕೆಟ್ಟದಾಗಿ ಬೈದು ನಿಂದಿಸಿ ಕೊಲೆ ಮಾಡುವ ಬೆದರಿಕೆ ಒಡ್ಡಿದ್ದಾರೆ.
