Kiran Reporter Haveri
ಹುಬ್ಬಳ್ಳಿ-ಅಂಕೋಲಾ ರಾಷ್ಟ್ರೀಯ ಹೆದ್ದಾರಿ ಅಂಚಿನ ಗೂಡಂಗಡಿ ಕ್ಯಾಂಟೀನ್’ಗೆ ಲಾರಿ ಗುದ್ದಿದೆ. ಪರಿಣಾಮ ಕ್ಯಾಂಟೀನ್ ಒಳಗಿದ್ದ ಗ್ಯಾಸ್ ಸಿಲೆಂಡರ್ ಸೋರಿಕೆಯಾಗಿದೆ. ಪೊಲೀಸರು ಹಾಗೂ ಅಗ್ನಿಶಾಮಕ ಸಿಬ್ಬಂದಿ ಚುರುಕುತನದ ಕಾರ್ಯಾಚರಣೆಯಿಂದ ಸಿಲೆಂಡರ್ ಸ್ಪೋಟ ಹಾಗೂ ಇನ್ನಿತರ ಅಪಾಯಗಳು ದೂರವಾಗಿದೆ.
ಹುಬ್ಬಳ್ಳಿ-ಅಂಕೋಲಾ ಹೆದ್ದಾರಿಯ ಅಂಚಿನ ಹಿಂದೂ ರುದ್ರಭೂಮಿ ಎದುರು ಪ್ರದೇಶದಲ್ಲಿ ಪುಟ್ಟದೊಂದು ಕ್ಯಾಂಟೀನ್ ಇದೆ. ಪ್ರತಿ ದಿನ ಬೆಳಗ್ಗೆ ನಾಲ್ವರು ಮಹಿಳೆಯರು ಸೇರಿ ಇಲ್ಲಿ ಬಿಸಿ ಬಿಸಿ ದೋಸೆ ಉಣಬಡಿಸುತ್ತಾರೆ. ಹೆದ್ದಾರಿ ಮೂಲಕ ಸಂಚರಿಸುವ ಅನೇಕ ಲಾರಿ ಚಾಲಕರು ಇಲ್ಲಿನ ಖಾಯಂ ಗ್ರಾಹಕರು. ಮಂಗಳವಾರ ಬೆಳಗ್ಗೆ ಸಹ ಮಹಾರಾಷ್ಟçದಿಂದ ಮಂಗಳೂರಿಗೆ ಈರುಳ್ಳಿ ತುಂಬಿಕೊoಡು ಸಂಚರಿಸುತ್ತಿದ್ದ ಲಾರಿ ಚಾಲಕ ಆ ಕ್ಯಾಂಟೀನ್’ಗೆ ತೆರಳಿದ್ದಾರೆ. ಚಾಲಕ ದೋಸೆ ಸವಿಯುತ್ತಿದ್ದ ಅವಧಿಯಲ್ಲಿಯೇ ಲಾರಿ ಕ್ಯಾಂಟಿನ್’ಗೆ ಗುದ್ದಿದೆ.
ಚಾಲಕ ಲಾರಿಯನ್ನು ಕೊಂಚ ಇಳಿಜಾರಿನಲ್ಲಿ ಕ್ಯಾಂಟೀನ್ ಕಡೆ ಮುಖ ಮಾಡಿ ನಿಲ್ಲಿಸಿದ್ದು ಅಪಘಾತಕ್ಕೆ ಮೂಲ ಕಾರಣ. ಮುನ್ನುಗ್ಗಿ ಬಂದ ಲಾರಿ ಕ್ಯಾಂಟೀನ್ ಒಳಗೆ ಪ್ರವೇಶಿಸಿದೆ. ಅಲ್ಲಿದ್ದ ಅಡುಗೆ ಗ್ಯಾಸ್ ಸಿಲೆಂಡರ್’ಗೆ ಲಾರಿ ಡಿಕ್ಕಿಯಾಗಿದೆ. ಇದರಿಂದ ಹೆದ್ದಾರಿ ಅಂಚಿನ ಕ್ಯಾಂಟೀನ್’ನಲ್ಲಿ ಸಿಲಿಂಡರ್ ಸೋರಿಕೆ ಉಂಟಾಗಿದೆ.
ಈ ಮಾಹಿತಿ ಅರಿತ ಅಗ್ನಿಶಾಮಕ ಸಿಬ್ಬಂದಿ ತಕ್ಷಣ ಸ್ಥಳಕ್ಕೆ ದಾವಿಸಿದರು. ಪೊಲೀಸರು ಸಹ ಅಲ್ಲಿಗೆ ಬಂದರು. ಸೋರಿಕೆಯಾಗುತ್ತಿದ್ದ ಗ್ಯಾಸ್ ಸಿಲೆಂಡರನ್ನು ಕ್ಯಾಂಟೀನ್‌ನಿoದ ಹೊರಗೆ ತಂದರು ಗಾಳಿ ಆಡುವ ಸ್ಥಳದಲ್ಲಿರಿಸಿ ಅಪಾಯ ಎದುರಾಗದಂತೆ ಮುನ್ನಚ್ಚರಿಕೆವಹಿಸಿದರು. ಪೊಲೀಸರು ಸಹ ಸಂಚಾರ ದಟ್ಟಣೆ ನಿಯಂತ್ರಿಸಿದರು. ಸಂತ್ರಸ್ತ ಮಹಿಳೆಯರನ್ನು ಸಮಾಧಾನ ಮಾಡಿದರು.
ಈ ಅಪಘಾತದಲ್ಲಿ ಯಾವುದೇ ಸಾವು-ನೋವು ಸಂಭವಿಸಿಲ್ಲ. ಸುಮಾರು ಎರಡು ತಾಸಿನ ಕಾರ್ಯಾಚರಣೆ ನಂತರ ಹೆದ್ದಾರಿ ಸಂಚಾರ ಸುಗಮವಾಗಿದೆ.
