ಕಾರವಾರ: ರಸ್ತೆ ಮೇಲೆ ನಡೆದು ಹೋಗುತ್ತಿದ್ದ ರಾಜೇಶ ದುದಾಳಕರ (50) ಅವರನ್ನು ಅಡ್ಡಗಟ್ಟಿದ ಮೂವರು ಅವರ ದವಡೆ ಮುರಿದಿದ್ದಾರೆ. ಹೀಗಾಗಿ ರಾಜೇಶ್ ಅವರು ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ಚೆಂಡಿಯಾದ ರಾಜೇಶ ದೇವಿದಾಸ ದುದಾಳಕರ (50) ವ್ಯಾಪಾರಿ. ಅವರು ತಮ್ಮ ಮನೆಯ ಉರುವಲಿಗಾಗಿ ಕಾಡಿಗೆ ಹೋಗಿ ಕಟ್ಟಿಗೆ ತಂದಿದ್ದರು. ಅದನ್ನು ಅ 27ರಂದು ಕೆಲಸದವರ ನೆರವಿನಿಂದ ಮನೆ ಬಳಿ ಖಾಲಿ ಮಾಡಿದ್ದರು. ನಂತರ ಕೆಲಸದವರನ್ನು ಮನೆಗೆ ಬಿಟ್ಟುಬರಲು ಅವರ ಜೊತೆ ನಡೆದು ಹೋಗುತ್ತಿದ್ದರು. ಆಗ ಅವರನ್ನು ಮಾರಿಯನ್ ಫ್ರಾನ್ಸಿಸ್ ಫರ್ನಾಂಡಿಸ್ ಎಂಬಾತ ಅಡ್ಡಗಟ್ಟಿ `ನನ್ನ ಜಾಗದ ಮೇಲೆ ಏಕೆ ಕಟ್ಟಿಗೆ ಹಾಕಿದ್ದೀಯಾ?’ ಎಂದು ಪ್ರಶ್ನಿಸಿ ಕಪಾಲಕ್ಕೆ ಬಾರಿಸಿದ್ದರಿಂದ ದವಡೆ ಹಲ್ಲು ಮುರಿದಿದೆ.
ಮಾರಿಯನ್ ಫರ್ನಾಂಡಿಸ್ ಜೊತೆಯಿದ್ದ ವಿನಾಯಕ ರಘುವೀರ ಸಾತರೇಕರ ಸಹ ಈ ವೇಳೆ ರಾಜೇಶ ದುದಾಳಕರ ಮೇಲೆ ಕೈ ಮಾಡಿದ್ದು, ಆಗ ನೋವು ಇನ್ನಷ್ಟು ಹೆಚ್ಚಾಗಿದೆ. ಇದಾದ ಮೇಲೆ ಅದೇ ಊರಿನ ರೂಪೇಶ ಗುನಗಿ ಸಹ ರಾಜೇಶ ದುದಾಳಕರ ಅವರ ಮನೆಗೆ ಬಂದು ಬೆದರಿಕೆ ಹಾಕಿದ ಬಗ್ಗೆ ಪೊಲೀಸ್ ದೂರು ದಾಖಲಾಗಿದೆ.
