ಉತ್ತರ ಕರ್ನಾಟಕದಲ್ಲಿ ಜೀವ ಪಡೆದ ಜೋಕುಮಾರಸ್ವಾಮಿ ಆಚರಣೆ!
ಹಾವೇರಿ: ಗಣೇಶ ಹಬ್ಬದ ಬೆನ್ನಲ್ಲೇ ಉತ್ತರ ಕರ್ನಾಟಕದ ಗ್ರಾಮೀಣ ಪ್ರದೇಶಗಳಲ್ಲಿ ವಿಶಿಷ್ಟ ಜನಪದ ಪರಂಪರೆಯಾದ ಜೋಕುಮಾರಸ್ವಾಮಿ ಆಚರಣೆಗೆ ಚಾಲನೆ ದೊರೆತಿದೆ. ಮಳೆ, ಬೆಳೆ ಹಾಗೂ ಸಮೃದ್ಧಿಯ ಸಂಕೇತವಾಗಿ ಜೋಕುಮಾರಸ್ವಾಮಿಯನ್ನು ಗ್ರಾಮಗಳಲ್ಲಿ ವಿಶೇಷವಾಗಿ ಆರಾಧಿಸಲಾಗುತ್ತದೆ.
ಮಣ್ಣಿನಿಂದ ಜೋಕುಮಾರಸ್ವಾಮಿಯ ಮೂರ್ತಿಯನ್ನು ರೂಪಿಸಿ, ವಿವಿಧ ರೀತಿಯಲ್ಲಿ ವಿಶೇಷ ಅಲಂಕಾರ ಮಾಡಲಾಗುತ್ತದೆ. ಬಳಿಕ ಮಹಿಳೆಯರು ಜೋಕುಮಾರಸ್ವಾಮಿಯನ್ನು ಹೊತ್ತುಕೊಂಡು ಮನೆ ಮನೆಗೆ ಮೆರವಣಿಗೆ ನಡೆಸುತ್ತಾರೆ.
ಈ ವೇಳೆ ಜನಪದ ಹಾಡುಗಳನ್ನು ಹಾಡುತ್ತಾ ಉತ್ತಮ ಮಳೆ, ಸಮೃದ್ಧ ಬೆಳೆ ಹಾಗೂ ಗ್ರಾಮದಲ್ಲಿ ಸುಭಿಕ್ಷೆ ನೆಲೆಸಲಿ ಎಂದು ಪ್ರಾರ್ಥಿಸಲಾಗುತ್ತದೆ. ಮನೆ ಮನೆಗೆ ತೆರಳುವ ಜೋಕುಮಾರಸ್ವಾಮಿಗೆ ಅಕ್ಕಿ, ಜೋಳ, ವಿವಿಧ ದವಸ ಧಾನ್ಯಗಳು, ಎಣ್ಣೆ ಹಾಗೂ ಹಣವನ್ನು ಕಾಣಿಕೆಯಾಗಿ ನೀಡಲಾಗುತ್ತದೆ.
ಜೋಕುಮಾರನಿಗೆ ನೀಡಿದ ಧಾನ್ಯದಿಂದ ಗ್ರಾಮದಲ್ಲಿ ಸಮೃದ್ಧಿ ಹೆಚ್ಚುತ್ತದೆ ಎಂಬ ನಂಬಿಕೆ ಕೂಡ ಗ್ರಾಮೀಣ ಜನರಲ್ಲಿ ಇದೆ. ಸುಮಾರು ಏಳು ದಿನಗಳ ಕಾಲ ಜೋಕುಮಾರಸ್ವಾಮಿ ಗ್ರಾಮದಲ್ಲಿ ಸಂಚರಿಸುತ್ತಾನೆ.
ಆಚರಣೆಯ ಕೊನೆಯಲ್ಲಿ ಜೋಕುಮಾರಸ್ವಾಮಿಯ ‘ಅಳಲು’ ಎಂಬ ಅಂತಿಮ ವಿಧಿ ನಡೆಯುತ್ತದೆ. ಮಣ್ಣಿನಿಂದ ರೂಪುಗೊಂಡ ಜೋಕುಮಾರಸ್ವಾಮಿ ಕೊನೆಗೆ ಮಣ್ಣಿನಲ್ಲಿಯೇ ವಿಲೀನಗೊಳ್ಳುವ ಮೂಲಕ ಆಚರಣೆ ಪೂರ್ಣಗೊಳ್ಳುತ್ತದೆ.
ಹೀಗೆ ಮಳೆ, ಬೆಳೆ ಹಾಗೂ ಸಮೃದ್ಧಿಯ ಆಶಯದೊಂದಿಗೆ ನಡೆಯುವ ಜೋಕುಮಾರಸ್ವಾಮಿ ಆಚರಣೆಯು ಉತ್ತರ ಕರ್ನಾಟಕದ ಗ್ರಾಮೀಣ ಕೃಷಿ ಸಂಸ್ಕೃತಿ ಹಾಗೂ ಜನಪದ ಪರಂಪರೆಯನ್ನು ಇಂದಿಗೂ ಜೀವಂತವಾಗಿರಿಸಿರುವ ಅಪರೂಪದ ಆಚರಣೆಯಾಗಿದೆ.
