ಮೀನು ಹಿಡಿಯಲು ಮಲ್ಪೆಯಿಂದ ಬಂದವರಿಗೆ ಮಂಡೆಬಿಸಿ

ಮೀನು ಸಂತಾನೋತ್ಪತ್ತಿಯ ಕಾಲವಾದ ಕಾರಣ ಸರ್ಕಾರ ಮೀನುಗಾರಿಕೆ ನಿಷೇಧಿಸಿ ಆದೇಶ ಹೊರಡಿಸಿದ್ದು, ಅರಬ್ಬಿ ಸಮುದ್ರದಲ್ಲಿ ಅಪಾಯದ ರೀತಿ ಅಲೆಗಳ ಅಬ್ಬರವಿದ್ದರೂ ಅದನ್ನು ಲೆಕ್ಕಿಸದೇ ಮಲ್ಪೆ ಮೀನುಗಾರರು ಕಡಲಿಗೆ ಇಳಿದಿದ್ದಾರೆ. ಉಡುಪಿಯಿಂದ ಕಾರವಾರಕ್ಕೆ ಬಂದ ಮೀನುಗಾರಿಕಾ ಬೋಟಿಗೆ ಇಲ್ಲಿನ ಅಧಿಕಾರಿಗಳು ಬಿಸಿಮುಟ್ಟಿಸಿ ಅವರ `ಮಂಡೆಬಿಸಿ’ ಮಾಡಿದ್ದಾರೆ.
ಮಲ್ಪೆಯ ಗಣಪತಿ ಹೆಸರಿನ ಬೋಟ್ ಹಾಗೂ ಮೀನುಗಾರಿಕಾ ಕಾರ್ಮಿಕರನ್ನು ಬೈತಖೋಲ್’ದಲ್ಲಿ ಮೀನುಗಾರಿಕಾ ಅಧಿಕಾರಿಗಳು ಜೂ 6ರಂದು ವಶಕ್ಕೆ ಪಡೆದರು. ಈ ವೇಳೆ ಸ್ಥಳೀಯ ಮೀನುಗಾರರು ಮಲ್ಪೆ ಮೀನು ಕಾರ್ಮಿಕರಿಗೆ ಬುದ್ದಿ ಹೇಳಿದರು. ಪ್ರತಿ ವರ್ಷ ಮೀನುಗಾರಿಕೆ ನಿಷೇಧದ ಮಾಹಿತಿ ಇದ್ದರೂ ಮಳೆಗಾಲದ ಅವಧಿಯಲ್ಲಿ ಮೀನುಗಾರಿಕೆ ನಡೆಸಿರುವುದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರು. ಬೋಟಿನ ಮಾಲಕರಿಗೆ ಬುದ್ದಿ ಹೇಳಿದ ಅಧಿಕಾರಿಗಳು `ಅಗಷ್ಟ್ 1ರ ನಂತರ ಮೀನುಗಾರಿಕೆಯ ಪರ್ವಕಾಲ ಶುರುವಾಗಲಿದೆ. ಆಗ ಸಮುದ್ರದ ಅಬ್ಬರ ಸಹ ಕಡಿಮೆ ಆಗಲಿದ್ದು, ಆ ವೇಳೆ ಕೆಲಸ ಶುರು ಮಾಡಿ’ ಎಂದು ಸೂಚಿಸಿ ನಂತರ ಅವರನ್ನು ಬಿಡುಗಡೆ ಮಾಡಿದರು. ಮತ್ತೆ ಈ ರೀತಿ ವರ್ತಿಸಿದಲ್ಲಿ ಬೋಟನ್ನು ಜಪ್ತು ಮಾಡುವುದಾಗಿ ಎಚ್ಚರಿಸಿದರು.