ಶಿರಸಿ: ಹುಸರಿ ಬಳಿಯ ಆರೆಕೊಪ್ಪ ಹಿತ್ತಲಗದ್ದೆಯ ರಾಮಚಂದ್ರ ಗಣಪತಿ ಭಟ್ಟ ಹಾಗೂ ಮಂಜುನಾಥ ಗಣಪತಿ ಭಟ್ಟ ನಡುವೆ ಹೊಡೆದಾಟ ನಡೆದಿದೆ. ಮಂಜುನಾಥ ಭಟ್ಟರ ಪಾಲಿಗೆ ಬಂದ ಜಾಗದಲ್ಲಿ ರಾಮಚಂದ್ರ ಭಟ್ಟರು ಬೇಲಿ ನಿರ್ಮಿಸಿರುವುದೇ ಈ ಹೊಡೆದಾಟಕ್ಕೆ ಕಾರಣ.
ಸೆ 29ರಂದು ರಾಮಚಂದ್ರ ಭಟ್ಟರು ಬೇಲಿ ನಿರ್ಮಿಸುತ್ತಿದ್ದರು. ತಮ್ಮ ಸ್ಥಳ ಹೊರತುಪಡಿಸಿ ಮಂಜುನಾಥ ಭಟ್ಟರ ಜಾಗಕ್ಕೂ ಅವರು ಬೇಲಿ ನಿರ್ಮಿಸಿದ್ದರು. ಆಗ, ಅಲ್ಲಿಗೆ ಬಂದ ಮಂಜುನಾಥ ಭಟ್ಟರು `ನನ್ನ ಜಾಗದಲ್ಲಿ ಏಕೆ ಬೇಲಿ ನಿರ್ಮಿಸುವೆ?’ ಎಂದು ಪ್ರಶ್ನಿಸಿದರು. ಇದಕ್ಕೆ ಸಿಟ್ಟಾದ ರಾಮಚಂದ್ರ ಭಟ್ಟರು ತನ್ನ ತಮ್ಮನಿಗೆ `ಬೋ.. ಸೂ… ಮಗ’ ಎಂದು ಕೆಟ್ಟದಾಗಿ ಬೈದು ಕೂಗಾಡಿದ್ದು, ಅಲ್ಲಿಯೇ ಇದ್ದ ದೊಣ್ಣೆಯಿಂದ ಹೊಡೆದರು. ಮುಖದ ಮೇಲೆ ಹೊಡೆತ ಬಿದ್ದ ಕಾರಣ ಮಂಜುನಾಥ ಭಟ್ಟರ ಮೂಗಿನಿಂದ ರಕ್ತ ಬಂದಿದೆ.
ನೋವಿನಿ0ದ ಮಂಜುನಾಥ ಭಟ್ಟರು ದೊಡ್ಡದಾಗಿ ಬೊಬ್ಬೆ ಹೊಡೆದಿದ್ದು, ಈ ವೇಳೆ ಅಲ್ಲಿಗೆ ಬಂದ ಅವರ ಪತ್ನಿ ಸುಮಂಗಲಾ ಇನ್ನಷ್ಟು ಏಟು ಬೀಳುವುದನ್ನು ತಪ್ಪಿಸಿದರು. ಪಕ್ಕದ ಮನೆಯ ಮಂಜುನಾಥ ಹೆಗಡೆ ಹಾಗೂ ಊರಿನ ಜನ ಸಹ ಈ ವೇಳೆ ಅಲ್ಲಿಗೆ ಜಮಾಯಿಸಿದ್ದು, ಅವರನ್ನು ನೋಡಿದ ರಾಮಚಂದ್ರ ಭಟ್ಟರು `ನಿನ್ನನ್ನು ಸುಮ್ಮನೆ ಬಿಡುವುದಿಲ್ಲ’ ಎಂದು ಬೆದರಿಕೆ ಒಡ್ಡಿ ಪರಾರಿಯಾಗಿದ್ದಾರೆ.
ಗಾಯಗೊಂಡು ಆಸ್ಪತ್ರೆ ಸೇರಿದ ಮಂಜುನಾಥ ಭಟ್ಟರು ಸಹೋದರನ ಕಿತಾಪತಿ ವಿರುದ್ಧ ಪೊಲೀಸ್ ದೂರು ನೀಡಿದ್ದಾರೆ.
