ಒಂಟಿ ಮನೆ ಮೇಲೆ ದುಷ್ಕರ್ಮಿಗಳ ದಾಳಿ: ವೃದ್ಧರ ಮೇಲೆ ಹಲ್ಲೆ ಮಾಡಿ ಪರಾರಿ!

ಸಿದ್ದಾಪುರ: ಮನೆಯೊಂದರ ಮೇಲೆ ದಾಳಿ ನಡೆಸಿದ ದುಷ್ಕರ್ಮಿಗಳು ಅಲ್ಲಿದ್ದ ಆರು ಜನರ ಮೇಲೆ ಹಲ್ಲೆ ನಡೆಸಿ ಪರಾರಿಯಾಗಿದ್ದಾರೆ. ಹಲ್ಲೆಗೆ ಒಳಗಾದವರಲ್ಲಿ ಬಹುತೇಕರು ವೃದ್ಧರು!

ಅಕ್ಟೊಬರ್ 22ರಂದು ನಸುಕಿನ 2.30ಕ್ಕೆ ದುಷ್ಕರ್ಮಿಗಳು ಹಂದ್ಯಾನೆ ಹೊಕ್ಕಳ್ಳಿ ಬಳಿಯ ತಂಡಾಗುoಡಿ ಶಿವಳೆಮನೆಯ ಬಾಗಿಲು ಬಡಿದಿದ್ದಾರೆ. ಮೊದಲು ಸಿಕ್ಕಿದ ಭಾಗೀರಥಿ ನಾರಾಯಣ ಭಟ್ಟ (83) ಅವರ ತಲೆ ಮತ್ತು ಹಣೆಗೆ ಹೊಡೆದಿದ್ದಾರೆ. ಅದಾದ ನಂತರ ಎದುರಿಗೆ ಸಿಕ್ಕಿದ ಗಣಪತಿ ನಾರಾಯಣ ಭಟ್ಟ (64) ಕಣ್ಣಿನ ಮೇಲೆ ಗುದ್ದಿದ್ದಾರೆ. ಅವರ ಕೆನ್ನೆಗೆ ಬಾರಿಸಿದ್ದರಿಂದ ಕಿವಿಗೂ ಪೆಟ್ಟಾಗಿದೆ. ಇದಾದ ಮೇಲೆ ದೇವರು ನಾರಾಯಣ ಭಟ್ಟ (61) ಅವರ ಮೇಲೆ ಹಲ್ಲೆ ಮಾಡಿದ್ದಾರೆ. ಪರಿಣಾಮ ದೇವರು ಅವರಿಗೆ ಹಣೆ ಹಾಗೂ ಕಣ್ಣಿನ ಬಳಿ ಗಾಯವಾಗಿದೆ.

ನಂತರ ಅಲ್ಲಿದ್ದ ಮಹಾಬಲೇಶ್ವರ ನಾರಾಯಣ ಭಟ್ಟ (58) ಹಾಗೂ ಮಂಜುನಾಥ ನಾರಾಯಣ ಭಟ್ಟ (57) ಎಂಬಾತರ ಮೇಲೆಯೂ ದುಷ್ಕರ್ಮಿಗಳು ಹಲ್ಲೆ ನಡೆಸಿದ್ದಾರೆ. ಕಣ್ಣು ಹಾಗೂ ಕೆನ್ನೆಯ ಮೇಲೆ ಜಜ್ಜಿದ್ದರಿಂದ ಅವರು ನೋವಿನಿಂದ ಬಳಲುತ್ತಿದ್ದಾರೆ. ಆದರೆ, ಈ ಹಲ್ಲೆ ಮಾಡಿದವರು ಯಾರು? ಏತಕ್ಕಾಗಿ ಹೀಗೆ ಮಾಡಿದರು? ಎಂಬುದು ಮನೆಯವರಿಗೆ ಸಹ ಗೊತ್ತಾಗಿಲ್ಲ. ತಮಗಾದ ನೋವಿನ ಬಗ್ಗೆ ದೇವರು ಹೆಗಡೆ ಪೊಲೀಸ್ ದೂರು ನೀಡಿದ್ದಾರೆ.