Kiran Reporter Haveri
ಮುಂಡಗೋಡಿನ ಶಾಸಕರ ಮಾದರಿ ಶಾಲೆಗೆ ಅಳವಡಿಸಿದ್ದ ಸಿಸಿ ಕ್ಯಾಮರಾ ಕಳ್ಳತನವಾಗಿದೆ. ಶಾಲಾ ಬಾಲಕನೊಬ್ಬ ಅದನ್ನು ಕದ್ದಿರುವುದಾಗಿಯೂ ಗೊತ್ತಾಗಿದೆ!
ಮುಂಡಗೋಡು ಪಟ್ಟಣದ ಪಿಎಂಶ್ರೀ ಶಾಸಕರ ಮಾದರಿ ಶಾಲೆಗೆ ಒಟ್ಟು 8 ಸಿಸಿ ಕ್ಯಾಮರಾ ಅಳವಡಿಸಲಾಗಿತ್ತು. ಅದರಲ್ಲಿ ಎರಡು ಸಿಸಿ ಕ್ಯಾಮರಾ ಶನಿವಾರ ಕಾಣೆಯಾಗಿದ್ದವು. ಕಳೆದ ಎರಡು ತಿಂಗಳ ಹಿಂದೆ ಅಳವಡಿಸಿದ್ದ ಕ್ಯಾಮರಾ ಕಾಣದ ಕಾರಣ ಹುಡುಕಾಟ ಶುರುವಾಯಿತು. ಬಾಲಕನೊಬ್ಬ ಕ್ಯಾಮರಾ ಕದ್ದಿರುವುದು ಇನ್ನೊಂದು ಸಿಸಿ ಕ್ಯಾಮರಾದೊಳಗೆ ಸೆರೆಯಾಗಿತ್ತು!
ಎರಡು ಕ್ಯಾಮರಾ ಕದ್ದ ನಂತರ ಹೆದರಿದ ಆ ಬಾಲಕ ಆ ಪೈಕಿ ಒಂದು ಕ್ಯಾಮರಾವನ್ನು ಶಾಲಾ ಆವರಣದಲ್ಲಿರಿಸಿರುವುದು ಗಮನಕ್ಕೆ ಬಂದಿತು. ಕಚೇರಿ ಪಕ್ಕದಲ್ಲಿರುವ ಕ್ಯಾಮರಾವನ್ನು ಆತ ಕೊಂಡೊಯ್ದಿದ್ದು, ಕ್ಯಾಮರಾ ಕಳ್ಳತನಕ್ಕೆ ಕಾರಣ ಮಾತ್ರ ಗೊತ್ತಾಗಲಿಲ್ಲ. ಕ್ಯಾಮರಾ ಕಳ್ಳತನದ ಬಗ್ಗೆ ಶಾಲಾ ಮುಖ್ಯೋದ್ಯಾಪಕ ವಿನೋದ ನಾಯಕ ಅವರು ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದಾರೆ.
ಕಳೆದ ವರ್ಷ ಈ ಶಾಲೆಯ ಬಾಗಿಲು ಮುರಿದು ಕಳ್ಳತನ ನಡೆದಿತ್ತು. ಶಾಲೆಯಲ್ಲಿದ್ದ ಪುಸ್ತಕ ಹಾಗೂ ಹಾಜರಾತಿ ಪುಸ್ತಕವನ್ನು ದುಷ್ಕರ್ಮಿಗಳು ಅಪಹರಿಸಿದ್ದರು. ಅಪರಾಧ ತಡೆಗೆ ಸಿಸಿ ಕ್ಯಾಮರಾ ಅಳವಡಿಸಿದ್ದು, ಇದೀಗ ಕ್ಯಾಮರಾವೇ ಕಳ್ಳತನವಾಗಿದ್ದರ ಬಗ್ಗೆ ಚರ್ಚೆ ನಡೆದಿದೆ. ಇನ್ನೂ, ಶಾಲಾ ಆವರಣದೊಳಗೆ ಕೆಲವರು ಪದೇ ಪದೇ ಆಗಮಿಸಿ ವಿದ್ವಂಸಕ ಕೃತ್ಯ ನಡೆಸುವ ಬಗ್ಗೆಯೂ ಆರೋಪಗಳಿವೆ.
