Kiran Reporter Haveri
ಜೊಯಿಡಾ: ಬಾಜಾರಕೊಣಂಗ ಮತ್ತು ಸುತ್ತಮುತ್ತಲ ಗ್ರಾಮಗಳಲ್ಲಿ ಗಂಡು ಹುಲಿ ಓಡಾಟ ಜೋರಾಗಿದೆ. ಜನವಸತಿ ಪ್ರದೇಶಗಳಿಗೂ ಈ ಹುಲಿಯ ಆಗಮನವಾಗುತ್ತಿದೆ. ರಸ್ತೆ ಅಂಚಿನಲ್ಲಿ ಓಡಾಡುವವರು ಸಹ ಹುಲಿಯ ನಡೆ ನೋಡಿ ಹೌಹಾರಿದ್ದಾರೆ.
ಹುಲಿ ಸಾಮಾನ್ಯವಾಗಿ ರಾತ್ರಿಯ ಸಮಯದಲ್ಲಿ ಸಕ್ರಿಯವಾಗಿರುವ ಪ್ರಾಣಿ. ರಾತ್ರಿ ವೇಳೆಯಲ್ಲಿಯೇ ಅದು ಬೇಟೆಯಾಗಿ ಆಹಾರ ಸೇವಿಸುತ್ತದೆ. ಹಗಲಿನಲ್ಲಿ ಆ ಜೀವಿಯ ಓಡಾಟ ಅಪರೂಪ. ನಾಗರಹೊಳೆ, ಬಂಡಿಪುರದAತಹ ಹುಲಿ ರಕ್ಷಿತಾರಣ್ಯ ಪ್ರದೇಶದಲ್ಲಿ ಸಹ ಹಗಲಿನ ವೇಳೆ ಹುಲಿ ಕಾಣಿಸುವುದು ಕಡಿಮೆ. ಆದರೆ, ಜೋಯಿಡಾ ಕಾಡಿನಲ್ಲಿ ಹಗಲಿನಲ್ಲಿ ಹುಲಿ ಓಡಾಟ ನಡೆಸಿರುವುದು ವಿಶೇಷ.
ಬಜಾರಕೊಣಂಗ- ಡಿಗ್ಗಿಯ ದಾರಿ ಮಧ್ಯದ ಕೊನೆಯ ಗ್ರಾಮ. ಈ ಪ್ರದೇಶದಲ್ಲಿ ಜನ ಸಂಖ್ಯೆಯೂ ಸಾಕಷ್ಟು ಪ್ರಮಾಣದಲ್ಲಿದೆ. ಈ ಭಾಗಗಳ ಗ್ರಾಮಸ್ಥರು ತಮ್ಮ ಕೆಲಸಕ್ಕೆ 40 ಕಿಮೀ ದೂರದ ಕುಂಭಾರವಾಡ ಅಥವಾ 50 ಕಿಮೀ ದೂರದ ಜೋಯಿಡಾಕ್ಕೆ ತೆರಳಿದವರು ತಮ್ಮ ಮನೆಗಳಿಗೆ ಮರಳಲು ತುರ್ತಾಗಿ ಪ್ರಯಾಣಿಸುತ್ತಿದ್ದಾರೆ. ಈ ಸಮಯದಲ್ಲಿ, ಇಬ್ಬರು ಬೈಕ್ ಸವಾರರು ಪ್ರಯಾಣಿಸುತ್ತಿದ್ದ ವೇಳೆ ಹುಲಿ ಕಾಣಿಸಿಕೊಂಡಿದೆ.
ಈ ಇಬ್ಬರು ತಮ್ಮ ಮೊಬೈಲ್‌ಗಳ ಮೂಲಕ ವೀಡಿಯೋಗಳನ್ನು ಶೂಟ್ ಮಾಡುತ್ತಿದ್ದರೆ ಹುಲಿ ಅವರ ಬಳಿ ನಿರಾತಂಕವಾಗಿ ಓಡಾಡುತ್ತಿರುವುದು ಕಾಣಿಸುತ್ತಿದೆ. `ನಾಲ್ಕು ವಾರಗಳಿಂದ ಈ ಹುಲಿಯನ್ನು ನೋಡುತ್ತಿದ್ದೇವೆ. ಜನ ಓಡಾಟಕ್ಕೂ ಹೆದರುತ್ತಿಲ್ಲ. ಇದಕ್ಕೂ ಮುಂಚೆ ಈ ಪ್ರದೇಶದಲ್ಲಿನ ಹುಲಿಗಳು ಮನುಷ್ಯರನ್ನು ಕಂಡರೆ ಹೆದರಿ ಅಡಗಿಕೊಳ್ಳುತ್ತಿದ್ದವು. ಅಲ್ಲದೇ ಹಗಲಿನಲ್ಲಿ ಎಂದೂ ಕಾಣಿಸಿಕೊಳ್ಳುತ್ತಿರಲಿಲ್ಲ. ಇದು ಬೇರೆಯ ಹುಲಿಗಳಿಗಿಂತ ವಿಭಿನ್ನವಾಗಿದೆ,” ಎಂದು ಆರಾಮಗಿ ಗ್ರಾಮದ ಅಜಯ್ ಮಿರಾಶಿ ವಿವರಿಸಿದರು.
