ಅಂಕೋಲಾ: ದಂಪತಿ ನಡುವೆ ನಡೆದ ಕಲಹದಲ್ಲಿ ಸಿಟ್ಟಾದ ಪತ್ನಿ ತನ್ನ ಪತಿಯ ಮೇಲೆ ಬಿಸಿ ನೀರಿನ ಅಭಿಷೇಕ ಮಾಡಿದ್ದು, ಈ ಪ್ರಕರಣ ಪೊಲೀಸ್ ಠಾಣೆಯ ಮೆಟ್ಟಿಲೇರಿದೆ.
ಪತ್ನಿ ಜೊತೆ ಜಗಳ ಮಾಡಿದ ಬಾಳೆಗುಳಿಯ ವಿಷ್ಣು ಬುದ್ದು ಗೌಡ ಇದೀಗ ಪಶ್ಚಾತಾಪದಲ್ಲಿ ಸೊರಗಿದ್ದಾರೆ. ಬಿಸಿ ನೀರಿನಲ್ಲಿ ಬೆಂದ ಅವರು ಆಸ್ಪತ್ರೆ ಸೇರಿದ್ದಾರೆ. ಶುಕ್ರವಾರ ರಾತ್ರಿ 10 ಗಂಟೆ ವೇಳೆಗೆ ವಿಷ್ಣು ಗೌಡ ಹಾಗೂ ಅವರ ಪತ್ನಿ ನಡುವೆ ಜಗಳ ಶುರುವಾಗಿದೆ. ಮಾತಿಗೆ ಮಾತು ಬೆಳೆದಾಗ ವಿಷ್ಣು ಅವರ ಪತ್ನಿ ಒಲೆ ಮೇಲಿದ್ದ ಬಿಸಿ ನೀರನ್ನು ಗಂಡನ ಮೇಲೆ ಸುರಿದಿದ್ದಾರೆ.
ಕುದಿಯುತ್ತಿದ್ದ ನೀರು ಚುಮುಕಿಸಿದ ಪರಿಣಾಮ ವಿಷ್ಣು ಗೌಡ ಅವರ ಮುಖ, ಕುತ್ತಿಗೆ, ಎದೆ ಹಾಗೂ ಬೆನ್ನಿನ ಭಾಗ ಸುಟ್ಟಿದೆ. ಗಾಯಗೊಂಡ ಅವರು ಆಸ್ಪತ್ರೆಗೆ ದಾಖಲಾಗಿದ್ದು, ಮುನಿಸಿಕೊಂಡ ಪತ್ನಿ ತವರು ಮನೆಗೆ ಹೋಗಿದ್ದಾರೆ.
