ಶಿರಸಿ: ಮುಸ್ಲಿಂ ಹುಡುಗಿ ಜೊತೆ ಐಸ್ ಕ್ರೀಂ ತಿನ್ನುತ್ತಿದ್ದ ಹುಡುಗನಿಗೆ ಮೂವರು ಸೇರಿ ಥಳಿಸಿದ್ದಾರೆ.
ಹಗಲಿನಲ್ಲಿ ಗೌಂಡಿ ಹಾಗೂ ರಾತ್ರಿ ವೇಳೆ ಸೆಕ್ಯುರಿಟಿಯಾಗಿ ಕೆಲಸ ಮಾಡುವ ರವೀಂದ್ರ ಜೀನದತ್ತ ಜೈನ್ ಅವರು ಕರಿಷ್ಮಾ ಚೆನ್ನಾಲರ (ಹೆಸರು ಬದಲಿಸಿದೆ) ಎಂಬಾತರಿಗೆ ಸಹಾಯ ಮಾಡಲು ಹೋಗಿ ಒದೆ ತಿಂದಿದ್ದಾರೆ. ಕರಿಷ್ಮಾ ಅವರು ಕೆಲಸ ಹುಡುಕುತ್ತಿದ್ದರು. ಅವರಿಗೆ ಸಹಾಯ ಮಾಡಲು ಹೋಗಿ ಕೊರ್ಲಕಟ್ಟಾ ಬಳಿಯ ಗೌಡಕೊಪ್ಪದ ರವೀಂದ್ರ ಜೈನ್ ಪೆಟ್ಟು ತಿಂದಿದ್ದಾರೆ.
ಬುಧವಾರ ಕರಿಷ್ಮಾರಿಗೆ ಕೆಲಸ ಕೊಡಿಸುವುದಕ್ಕಾಗಿ ರವೀಂದ್ರ ಜೈನ್ ಅವರನ್ನು ರೋಟರಿ ಆಸ್ಪತ್ರೆಗೆ ಕರೆದೊಯ್ದಿದ್ದರು. ಅಲ್ಲಿಂದ ಮನೆಗೆ ಮರಳುವ ಮುನ್ನ ಇಬ್ಬರು ಸೇರಿ ಶಿವಾಜಿ ಚೌಕದ ಬಳಿ ಐಸ್ ಕ್ರೀಂ ತಿನ್ನಲು ಹೋಗಿದ್ದರು. ಆಗ ಅಲ್ಲಿಗೆ ಬಂದ ರಾಜೀವನಗರದ ಶಕೀಲ್ ಅಹ್ಮದ್, ಭೂತಪ್ಪನಕಟ್ಟೆ ಬಳಿಯ ಮಹಮದ್ ಮಾಜ್ ಹಾಗೂ ಗೋಲಕರ ಓಣಿಯ ಉಬೇದ ಇಕ್ಬಾಲ್ ರವೀಂದ್ರ ಜೈನ್ ಮೇಲೆ ದಾಳಿ ಮಾಡಿದ್ದಾರೆ.
ಈ ಮೂರು ಜನ ಸೇರಿಕೊಂಡು ಮೊದಲು `ಮುಸ್ಲಿಂ ಹುಡುಗಿಯನ್ನು ಪ್ರೀತಿ ಮಾಡುತ್ತೀಯಾ? ಎಂದು ಪ್ರಶ್ನಿಸಿದ್ದಾರೆ. ನಂತರ ರವೀಂದ್ರ ಜೈನ್’ರಿಗೆ ಮಾತನಾಡಲು ಅವಕಾಶ ಕೊಡದೇ ಹೊಡೆದಿದ್ದಾರೆ. ರವೀಂದ್ರ ಜೈನ್’ರನ್ನು ನೆಲಕ್ಕೆ ಬೀಳಿಸಿ ಕಾಲಿನಿಂದ ಒದ್ದು ಹಲ್ಲೆ ಮಾಡಿದ್ದಾರೆ. ಈ ವೇಳೆ ಅಲ್ಲಿದ್ದ ಕಲ್ಲನ್ನು ತೆಗೆದುಕೊಂಡ ಶಕೀಲ ಅಹ್ಮದ್ ರವೀಂದ್ರ ಜೈನರ ಬೆನ್ನಿನ ಮೇಲೆ ಕಲ್ಲಿನಿಂದ ಜಜ್ಜಿದ್ದಾರೆ.
ಇದಾದ ನಂತರ ಮೂವರು ಸೇರಿ ಜೀವ ಬೆದರಿಕೆ ಒಡ್ಡಿದ್ದು, ನಂತರ ಪರಾರಿಯಾಗಿದ್ದಾರೆ.
