ಕುಮಟಾ: ಬರ್ಗಿ ಘಟಿಬೀರ ದೇವಸ್ಥಾನದ ಕಾಣಿಕೆ ಹುಂಡಿ ಒಡೆದ ಕಳ್ಳರು ಅಲ್ಲಿದ್ದ 1 ಸಾವಿರ ರೂ ಎಗರಿಸಿದ ನಂತರ ಸಿಸಿ ಕ್ಯಾಮರಾವನ್ನು ಸಹ ಕದ್ದೊಯ್ದಿದ್ದಾರೆ. ಸಿಸಿ ಕ್ಯಾಮರಾಗೆ ಅಳವಡಿಸಿದ್ದ ಹಾರ್ಡಡಿಸ್ಕ್, ಬ್ಯಾಟರಿ ಸೇರಿ ಒಟ್ಟು 48,500ರೂ ಮೌಲ್ಯದ ಸಾಮಗ್ರಿಗಳು ಕಳ್ಳರ ಪಾಲಾಗಿದೆ.
ಕುಮಟಾ ತಾಲೂಕಿನ ಬರ್ಗಿ ಘಟಿಬೀರ ದೇವಸ್ಥಾನದ ಮುಖ್ಯಸ್ಥರು ಡಿ 11ರ ರಾತ್ರಿ 8 ಗಂಟೆಗೆ ದೇವಾಲಯದ ಬಾಗಿಲು ಹಾಕಿದ್ದರು. ಬೆಳಗ್ಗೆ 8 ಗಂಟೆಗೆ ಬಂದು ನೋಡಿದಾಗ ಬಾಗಿಲು ಮುರಿದಿರುವುದು ಕಾಣಿಸಿತು. ಒಳಗೆ ಹೋಗಿ ಪರಿಶೀಲಿಸಿದಾಗ ಅಲ್ಲಿ ಕಾಣಿಕೆ ಹುಂಡಿ ಒಡೆದಿದ್ದು, ಭಕ್ತರು ನೀಡಿದ್ದ ಹಣವನ್ನು ಕಳ್ಳರು ದೋಚಿದ್ದರು.
ಈ ಕಳ್ಳತನ ನಡೆಸಿದವರು ಯಾರು? ಎಂದು ಪರಿಶೀಲಿಸುವುದಕ್ಕಾಗಿ ದೇವಾಲಯದ ಅಧ್ಯಕ್ಷ ಕುರಿಗದ್ದೆ ಗೋವಿಂದ ನಾಯಕ ಸಿಸಿ ಕ್ಯಾಮರಾ ಪರಿಶೀಲನೆಗೆ ಹೋದರು. ಅಲ್ಲಿ ನೋಡಿದರೆ ಸಿಸಿ ಕ್ಯಾಮರಾ ಸಹ ಇರಲಿಲ್ಲ. ದೇಗುಲದ ಗರ್ಭಗುಡಿಗೆ ನುಗ್ಗಿದ ಕಳ್ಳರು ಅಲ್ಲಿದ್ದ ಕ್ಯಾಮರಾ ಜೊತೆ ಇನ್ನೊಂದು ಕೋಣೆಯಲ್ಲಿದ್ದ ಡಿವಿಆರ್, ಹಾರ್ಡಡಿಸ್ಕ್, ಬ್ಯಾಟರಿಯನ್ನು ದೋಚಿದರು. ಇದರೊಂದಿಗೆ ದೇವಾಲಯಕ್ಕೆ ಹಾಕಿದ್ದ ಎಲ್ಇಡಿ ಬೋರ್ಡನ್ನು ಸಹ ಕಳ್ಳರು ಬಿಟ್ಟಿರಲಿಲ್ಲ.
ಕಳ್ಳರ ಕೈ ಚಳಕಕ್ಕೆ ಬೆದರಿದ ಊರಿನವರು ಈ ಬಗ್ಗೆ ಚರ್ಚೆ ನಡೆಸಿ ಪೊಲೀಸ್ ದೂರು ನೀಡಲು ನಿರ್ಧರಿಸಿದರು. ಅದರ ಪ್ರಕಾರ ಗೋವಿಂದ ನಾಯಕ ಅವರು ಗೋಕರ್ಣ ಪೊಲೀಸ್ ಠಾಣೆಗೆ ತೆರಳಿ ಘಟನಾವಳಿಗಳ ಬಗ್ಗೆ ದೂರು ನೀಡಿದರು. ಪ್ರಕರಣ ದಾಖಲಿಸಿಕೊಂಡ ಎಎಸ್ಐ ಯಲ್ಲಪ್ಪ ಕಾಗೇವಾಡ ಕಳ್ಳರ ಹುಡುಕಾಟ ನಡೆಸಿದ್ದಾರೆ.
