ನಿಮ್ಮ ನಂಬಿಕೆ ಇನ್ನೊಬ್ಬ ಅಸಾರಾಂ, ಇನ್ನೊಬ್ಬ ನಿತ್ಯಾನಂದನನ್ನ ಹುಟ್ಟುಹಾಕದಿರಲಿ

ಜೀವನದ ಉದ್ದಕ್ಕೂ ಹೊರಾಡುತ್ತೇವೆ. ಅದೆಷ್ಟೋ ಚಪ್ಪಲಿಗಳು ಅಲೆದಾಟದಲ್ಲೇ ಸವೆದು ಹೋಗುತ್ತದೆ. ಯಾಕೆ ಅಲೆಯುತ್ತೇವೆ? ಯಾಕೆ ಹೋರಾಡುತ್ತೇವೆ? ಯಾವುದಕ್ಕೂ ಉತ್ತರವಿಲ್ಲ. ಹುಟ್ಟಿದ್ದೇವೆ, ಬದುಕಬೇಕು, ಬದುಕುತ್ತಿದ್ದೇವೆ. ಒಂದು ಸಾಚುರೇಷನ್ನಿಗೆ ಹೋದ ನಂತರ, ಜೀವನ ಇಷ್ಟೇನಾ? ಎಂದೆನ್ನಿಸುತ್ತೆ. ಸಂಸಾರದ ಒತ್ತಡ, ಬಾಸ್‌ ಕೊಡುವ ಕಿರಿಕಿರಿಯಾದ ಟಾಸ್ಕು, ಯಾವುದೋ ಭಾಷೆ ಬಾರದ ಮ್ಯಾನೆಜರ್‌ನ ಬೈಗುಳ, ತಿಂಗಳಾಂತ್ಯದ ಇಎಂಐ, ಮಕ್ಕಳ ಪೀಸು, ಹೆಂಡತಿಯ ತಲೆಹರಟೆ, ಇವೆಲ್ಲದೂ ಸಾಕು ಎನ್ನಿಸುತ್ತದೆ. ಮನಸ್ಸಲ್ಲಿನಲ್ಲೊಂದು ಒಣ ವೈರಾಗ್ಯ ಹುಟ್ಟಿದ ನಂತರ ನೀವು ನೆಮ್ಮದಿಯನ್ನ ಹುಡುಕುತ್ತ ಅಲೆಯುತ್ತೀರಿ. ಕೆಲವರು ಟೆಂಪಲ್‌ ರನ್‌ ಮಾಡಿದರೆ, ಕೆಲವರು ಸ್ವಾಮಿಗಳನ್ನ, ಭವಿಷ್ಯಗಾರರನ್ನ ನಂಬಿ ಬದುಕುತ್ತಾರೆ. ನಂಬಿಕೆ ನಂಬಿಕೆ ಆಗೆ ಇದ್ದರೆ ಪರವಾಗಿಲ್ಲ. ನಂಬಿಕೆ ಅತಿ ಯಾಗಿ ಬಿಟ್ಟರೆ? ಯಾವುದೋ ಸ್ವಾಮಿ ಅದೇನೋ ಹೇಳಿದ, ನಿಮ್ಮ ಪುಣ್ಯವೋ, ಕಾಕತಾಳೀಯವೋ, ಆತ ಹೇಳಿದಂತೆ ಆಗಿ ಬಿಡುತ್ತದೆ. ನೀವು ಆತನನ್ನ ದೇವರೆಂದುಕೊಳ್ಳುತ್ತೀರಿ. ಆತನನ್ನ ಪೂಜಿಸುವುದಕ್ಕೆ, ಆರಾಧಿಸುವುದಕ್ಕೆ ಶುರು ಮಾಡಿಬಿಡುತ್ತೀರಿ. ಅಲ್ಲಿಯವರೆಗೆ ಯಾವುದೋ ಸ್ವಾಮಿಯಾಗಿದ್ದಾತ, ನಿಧಾನಕ್ಕೆ ನಿಮ್ಮ ಮನಸ್ಸಲ್ಲಿ ದೇವರಾಗಿ ಬಿಡುತ್ತಾನೆ. ನೀವು ಊಟ ಯಾವಾಗ ಮಾಡಬೇಕು? ಯಾವಾಗ ಸ್ನಾನ ಮಾಡಬೇಕು? ನಿಮ್ಮ ಮಗಳಿಗೆ ಯಾವ ಹುಡುಗ ಫರ್ಫೆಕ್ಟು? ಯಾವ ಹುಡುಗಿಯನ್ನ ಮದುವೆಯಾದರೆ ನಿಮ್ಮ ಮಗ ಚನ್ನಾಗಿರುತ್ತಾನೆ ? ಪೂಜೆಯಲ್ಲಿ ಕೊಳೆತ ಕಾಯಿ ಬಂದದ್ದರ ಶಕುನವೇನು? ಇವನ್ನೆಲ್ಲ ಆತನ ಎದುರು ಇಡಲು ಶುರು ಮಾಡಿಬಿಡುತ್ತೀರಿ.