ಮುಂಡಗೋಡ: ದೀಪಾವಳಿ ಅಂಗವಾಗಿ ನಡೆದ ‘ಹೋರಿ ಹಬ್ಬ’ದ ವೇಳೆ ಅವಘಡ ನಡೆದಿದೆ. ಜಾನುವಾರು ಬೆದರಿಸುವ ಸ್ಪರ್ಧೆ ನೋಡಲು ಆಗಮಿಸಿದವನ ಮೇಲೆ ಹೋರಿ ದಾಳಿ ನಡೆಸಿದ್ದು ಆ ಆಕ್ರಮಣಕ್ಕೆ 21 ವರ್ಷದ ಯುವಕ ಸಾವನಪ್ಪಿದ್ದಾನೆ.
ಚಿಗಳ್ಳಿ ಗ್ರಾಮದ ಕಲ್ಮೇಶ್ವರ ಮಠದ ಬಳಿ ದೀಪಾವಳಿ ಹಬ್ಬದ ವೇಳೆ ಸಾಂಪ್ರದಾಯಿಕ ‘ಹೋರಿ ಹಬ್ಬ’ ನಡೆಯುತ್ತದೆ. ಈ ಹಿಂದೆ ಸಹ ಹೋರಿ ಬೆದರಿಸುವ ವೇಳೆ ಸಾವು-ನೋವು ಸಂಭವಿಸಿದ್ದರಿಂದ ಈ ಸ್ಪರ್ಧೆ ನಡೆಸಲು ಸರ್ಕಾರ ಅನುಮತಿ ನೀಡುತ್ತಿಲ್ಲ. ಅದಾಗಿಯೂ ಈ ಬಾರಿ ಊರಿನವರು ಈ ಸ್ಪರ್ಧೆಗೆ ಅವಕಾಶ ಕೋರಿದ್ದು, ಪೊಲೀಸರು ಸಹಮತ ವ್ಯಕ್ತಪಡಿಸಿರಲಿಲ್ಲ.
ಆದರೂ, ಸಂಪ್ರದಾಯ ಮುಂದುವರೆಸುವ ನಿಟ್ಟಿನಲ್ಲಿ ಶನಿವಾರ ಹೋರಿ ಬೆದರಿಸುವ ಸ್ಪರ್ಧೆ ನಡೆಯಿತು. ಈ ವೇಳೆ ಆಕ್ರಮಣಾಕಾರಿ ಹೋರಿ ಜನ ನೆರೆದಿದ್ದ ಕಡೆ ನುಗ್ಗಿದ್ದು ಅಲ್ಲಿದ್ದವರು ಹೋರಿಯಿಂದ ತಪ್ಪಿಸಿಕೊಳ್ಳಲು ಓಡಲು ಶುರು ಮಾಡಿದರು. ಈ ವೇಳೆ ಎದುರಿಗೆ ಸಿಕ್ಕ ಪರಮೇಶ ಹರಿಜನ ಎಂಬಾತರನ್ನು ಹೋರಿ ಇರಿದಿದೆ.
ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದ ಪರಮೇಶ ಅವರನ್ನು ಬದುಕಿಸಿಕೊಳ್ಳುವ ಪ್ರಯತ್ನ ನಡೆಯಿತು. ಆದರೆ, ಪ್ರಯೋಜನವಾಗಲಿಲ್ಲ.
