ದಾಂಡೇಲಿ: ಧಾರವಾಡದ ಆಳ್ನಾವರ ಬಳಿಯ ಹಣ್ಣಿನ ವ್ಯಾಪಾರಿ ಎಜಜಾ ಅಹ್ಮದ್ ಹಣ್ಣುಗಳ ಜೊತೆ ಗಾಂಜಾವನ್ನು ಸಹ ಮಾರಾಟ ಮಾಡುತ್ತಾರೆ. ಇದೀಗ ಗಾಂಜಾ ಮಾರಾಟಕ್ಕೆ ದಾಂಡೇಲಿಗೆ ಬಂದಿದ್ದ ಅವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಕ್ರಿಸ್ ಮಸ್ ಹಬ್ಬದ ಅವಧಿಗೆ ಗಾಂಜಾ ವ್ಯಾಪಾರ ನಡೆಸುವ ಉದ್ದೇಶದಿಂದ ಎಜಜಾ ಅಹ್ಮದ್ ದಾಂಡೇಲಿಗೆ ಬಂದಿದ್ದ. ಹಳಿಯಾಳ ರಸ್ತೆಯ ಲಾರಿ ನಿಲ್ದಾಣದ ಬಳಿ ಆತ ಹಲವರನ್ನು ಮಾತನಾಡಿಸಿ ವ್ಯವಹಾರ ಕುದುರಿಸಿದ್ದ. `ತಾನು ದೊಡ್ಡ ಪ್ರಮಾಣದಲ್ಲಿ ಗಾಂಜಾ ಕೊಡುವೆ. ಅದನ್ನು ಮಾರಾಟ ಮಾಡಿ’ ಎಂದು ಕೆಲ ಎಜಂಟರನ್ನು ಆತ ಪುಸಲಾಯಿಸಿದ್ದ. ಅವರಿಗೆ ಗಾಂಜಾ ಉಡುಗರೆಯನ್ನು ಸಹ ಆತ ನೀಡುತ್ತಿದ್ದ.
ಅದಾಗಿಯೂ 70 ಸಾವಿರ ರೂ ಮೌಲ್ಯದ 1.812 ಕೆಜಿ ಗಾಂಜಾ ಆತನ ಬಳಿ ಉಳಿದಿದ್ದು, ಅದನ್ನು ಮಾರಾಟ ಮಾಡಿ ಊರಿಗೆ ಹೋಗಲು ನಿರ್ಧರಿಸಿದ್ದ. ಕಪ್ಪು ಬಣ್ಣದ ಡಿಯೋ ಸ್ಕೂಟಿಯಲ್ಲಿ ಬಟ್ಟೆಯಲ್ಲಿ ಸುತ್ತಿಕೊಂಡಿದ್ದ ಗಾಂಜಾ ಹಿಡಿದು ತಿರುಗಾಡುತ್ತಿದ್ದಾಗ ಆತ ಪೊಲೀಸರ ಕಣ್ಣಿಗೆ ಬಿದ್ದಿದ್ದ.
ಪೊಲೀಸ್ ಉಪನಿರೀಕ್ಷಕ ಐ ಆರ್ ಗಡ್ಡೇಕರ್ ಅವರು ಆತನನ್ನು ವಿಚಾರಣೆಗೆ ಒಳಪಡಿಸಿದಾಗ ತಡವರಿಸಿದ್ದ. ಸ್ಕೂಟಿಯನ್ನು ಪರಿಶೀಲಿಸಿದಾಗ ಭಾರೀ ಪ್ರಮಾಣದ ಗಾಂಜಾ ಸಿಕ್ಕಿದ್ದು, ಹಣ್ಣಿನ ವ್ಯಾಪಾರದ ಕಸುಬಿನ ಜೊತೆ ಗಾಂಜಾ ವ್ಯಾಪಾರದ ಉಪಕಸುಬು ನಡೆಸುವುದನ್ನು ಒಪ್ಪಿಕೊಂಡಿದ್ದ. ಈ ಹಿನ್ನಲೆ ಪೊಲೀಸರು ಆತನ ವಿರುದ್ಧ ಪ್ರಕರಣ ದಾಖಲಿಸಿದರು.
