ಕೃಷಿ ಗೋದಾಮಿನಲ್ಲಿ ಅಡಗಿ ಕುಳಿತಿದ್ದ ಕಪ್ಪು ಚಿರತೆಯನ್ನು ಶಿರಸಿ ಅರಣ್ಯ ಸಿಬ್ಬಂದಿ ಕಾಡಿಗೆ ಓಡಿಸಿದ್ದಾರೆ.
ಶಿರಸಿ ತಾಲೂಕಿನ ಮೂಲೆಮನೆ ಮಹಾಬಲೇಶ್ವರ ಹೆಗಡೆ ಅವರ ಮನೆಯ ಸ್ನಾನದ ಗೃಹದ ಪಕ್ಕದಲ್ಲಿ ಶುಕ್ರವಾರ ಚಿರತೆ ಕಾಣಿಸಿತು. ಕೃಷಿ ಉಪಕರಣಗಳನ್ನು ಇಡುವ ಈ ಪ್ರದೇಶದ ಮೂಲೆಯಲ್ಲಿ ಚಿರತೆ ಅಡಗಿ ಕುಳಿತಿತ್ತು. ಒಲೆಗೆ ಬೆಂಕಿ ಹಾಕುವುದಕ್ಕಾಗಿ ಮಹಾಬಲೇಶ್ವರ ಹೆಗಡೆ ಅವರಿಗೆ ಹೊಳೆಯುವ ಕಣ್ಣು ಕಾಣಿಸಿತು. ಹತ್ತಿರ ಹೋದಾಗ ಚಿರತೆಯ ಘರ್ಜನೆ ಕೇಳಿಸಿತು.
ಇದರಿಂದ ಮನೆಯೊಳಗಿದ್ದವರು ಆತಂಕಕ್ಕೆ ಒಳಗಾದರು. ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದರು. ಸ್ಥಳಕ್ಕೆ ಅರಣ್ಯ ಇಲಾಖೆ ಸಿಬ್ಬಂದಿ ಚಿರತೆ ಓಡಿಸಲು ಸಾಕಷ್ಟು ಪ್ರಯತ್ನ ನಡೆಸಿದರು. ಮಾನವನ ಮಾತಿನ ಸದ್ದಿಗೆ ಬೆದರಿದ ಚಿರತೆ ಕಟ್ಟಿಗೆಯಿಡುವ ಮನೆ ಕಡೆ ಸಂಚರಿಸಿತು. ಆದರೆ, ವಸತಿ ಪ್ರದೇಶ ಬಿಟ್ಟು ಕಾಡಿಗೆ ತೆರಳಲು ಸಾಕಷ್ಟು ಚಡಪಡಟಿಕೆ ಅನುಭವಿಸಿತು.
ಚಿರತೆ ಅವಿತ ಕೋಣೆ ಕತ್ತಲೆಯಿಂದ ಕೂಡಿರುವುದು ಕಾರ್ಯಾಚರಣೆಗೆ ತೊಡಕಾಯಿತು. ಪಟಾಕಿ ಹೊಡೆದು ಚಿರತೆಯನ್ನು ಕೊಣೆಯಿಂದ ಹೊರಗೆ ತಂದು ಬಲೆಯಲ್ಲಿ ಬಂಧಿಸುವ ಪ್ರಯತ್ನ ನಡೆಯಿತು. ಆದರೆ, ಅದು ಫಲ ಕೊಡಲಿಲ್ಲ.
ಸತತ ಮೂರು ಗಂಟೆ ಪ್ರಯತ್ನದ ನಂತರ ಅರಣ್ಯ ಸಿಬ್ಬಂದಿ ಚಿರತೆಯನ್ನು ಕೋಣೆಯಿಂದ ಹೊರ ಹಾಕಿದರು. ಕೊನೆಗೆ ಚಿರತೆ ಕಾಡಿನ ಕಡೆ ಓಡಿತು.
