ಆಕಸ್ಮಿಕವಾಗಿ ಏರ್ ಗನ್ ಟ್ರಿಗರ್ ಒತ್ತಿದ ಮಕ್ಕಳು: 9 ವರ್ಷದ ಬಾಲಕ ಸಾವು

ಅಡಕೆ ತೋಟ ಕಾಯುವ ವ್ಯಕ್ತಿ ಬಗಲಿಗೆ ಹಾಕಿಕೊಂಡಿದ್ದ ಏರ್ ಗನ್ ನ ಟ್ರಿಗರ್ ನ್ನು ಬಾಲಕನೋರ್ವ ಒತ್ತಿ, ಎದುರು ನಿಂತಿದ್ದ ಇನ್ನೊಬ್ಬ ಬಾಲಕನಿಗೆ ಬಡಿದು ಸಾವನ್ನಪ್ಪಿದ ಘಟನೆ ಶಿರಸಿ ತಾಲೂಕಿನ ಸೋಮನಳ್ಳಿಯಲ್ಲಿ ಸೋಮವಾರ ಮುಂಜಾನೆ ನಡೆದಿದೆ.

ಕರಿಯಪ್ಪ ಎಂಬ 9 ವರ್ಷ ಬಾಲಕ ಮೃತಪಟ್ಟ ದುರ್ದೈವಿ. ಮೂಲತಃ ಹಾವೇರಿ ಜಿಲ್ಲೆಯ ತಿಪಟೂರಿನವರಾದ ಬಾಲಕನ ಕುಟುಂಬ ಸೋಮನಳ್ಳಿಯ ರಾಘವ ಹೆಗಡೆ ಅವರ ತೋಟದಲ್ಲಿ ಕೆಲಸ ಮಾಡುತ್ತಿದ್ದರು. ಶಾಲೆಗೆ ರಜೆ ಇದ್ದ ಕಾರಣ ಮಕ್ಕಳು ರಾಘವ ಹೆಗಡೆ ಅವರ ಮನೆ ಮುಂದೆ ಆಟವಾಡಿಕೊಂಡಿದ್ದರು.

Advertisement. Scroll to continue reading.

ಈ ವೇಳೆ ನಿತೀಶ ಎಂಬವರು ತೋಟ ಕಾಯುವ ಸಲುವಾಗಿ ಏರ್ ಗನ್ ಹಿಡಿದು ಮನೆಯಂಗಳಕ್ಕೆ ಬಂದಿದ್ದರು. ಆಟವಾಡುತ್ತಿದ್ದ ಬಾಲಕರು ಏರ್ ಗನ್ ನ ಟ್ರಿಗರ್ ಜಗ್ಗಿಬಿಟ್ಟಿದ್ದಾರೆ. ಗುಂಡು ಎದುರು ನಿಂತಿದ್ದ ಬಾಲಕನ ಎದೆಗೆ ಬಡಿದು ಆತ ಅಲ್ಲಿಯೇ ಬಿದ್ದಿದ್ದಾನೆ.

ತಕ್ಷಣವೇ ಬಾಲಕನನ್ನು ಶಿರಸಿಯಖಾಸಗಿ ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಕಾರಿಯಾಗದೇ ಸಾವಿಗೀಡಾಗಿದ್ದಾನೆ