ವೀಲ್ ಚೇರ್, ವಾಟರ್ ಬೆಡ್, ವಾಕರ್ ಸೇರಿ ಬಳಕೆಯಲ್ಲಿ ಇಲ್ಲದ ವೈದ್ಯಕೀಯ ಉಪಕರಣಗಳು ನಿಮ್ಮಲ್ಲಿದ್ದರೆ ಅದನ್ನು ಬಿಸಾಡಬೇಡಿ. ಅದನ್ನು ಅರ್ಹರಿಗೆ ತಲುಪಿಸುವ ವ್ಯವಸ್ಥೆಗೆ ಶಿರಸಿಯಲ್ಲಿ ಚಾಲನೆ ಸಿಕ್ಕಿದ್ದು, ನಿಮ್ಮಲ್ಲಿರುವ ಉಪಕರಣದ ಬಗ್ಗೆ ಅಲ್ಲಿನ ಡೈರಿಯಲ್ಲಿ ನಮೂದಿಸಿ.. ಅಗತ್ಯವಿದ್ದವರಿಗೆ ಆ ಉಪಕರಣ ತಲುಪಿಸಿ!
ಶಿರಸಿಯ ಹೊಸಪೇಟೆ ರಸ್ತೆಯಲ್ಲಿರುವ ಡಾ ರವಿಕಿರಣ ಪಟವರ್ಧನ ಅವರ ಆಯುರ್ವೇದ ಆಸ್ಪತ್ರೆಯಲ್ಲಿ `ಉಪಯೋಗಿಸಿ ಸುಸ್ಥಿತಿಯಲ್ಲಿಯ ವೈದ್ಯಕೀಯ ಸಲಕರಣೆ ಸಂಪರ್ಕ ಪಟ್ಟಿ’ಯನ್ನಿಡಲಾಗಿದೆ. ಯಾರೂ ಬೇಕಾದರು ಅಲ್ಲಿಗೆ ಬಂದು ತಮ್ಮ ಬಳಿಯಿರುವ ವೈದ್ಯಕೀಯ ಉಪಕರಣದ ಬಗ್ಗೆ ಬರೆಯಬಹುದು. ಹೆಸರು ಹಾಗೂ ಫೋನ್ ನಂ ನಮೂದಿಸುವುದು ಕಡ್ಡಾಯ. ಅಗತ್ಯವಿರುವವರು ಸಹ ಡೈರಿ ನೋಡಿ ಅಗತ್ಯವಿರುವ ಉಪಕರಣವನ್ನು ಪಡೆಯಬಹುದು. ಈ ಸೇವೆಗಾಗಿ ಯಾರೂ ಆಸ್ಪತ್ರೆಗೆ ಹಣ ನೀಡುವ ಅಗತ್ಯವಿಲ್ಲ.
ತೆಲಂಗ ಸಹ್ಯಾದ್ರಿ ಪ್ರೌಢಶಾಲೆಯ ಶಿಕ್ಷಕರಾಗಿದ್ದ ಆರ್ ವಿ ಹೆಗಡೆ ಅವರನ್ನು ಸ್ಮರಿಸಿ ಗಣಪತಿ ನೀಲಕಂಠ ಪಟವರ್ಧನ್ ಪ್ರತಿಷ್ಠಾನದವರು ಇಂಥಹದೊAದು ಯೋಜನೆ ಶುರು ಮಾಡಿದ್ದಾರೆ. ತೆಲಂಗ ಸಹ್ಯಾದ್ರಿ ಹಳೆ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಸುಧೀರ್ ಶಾನಭಾಗ ಅವರ ಬಳಿ ಹಿರಿಯರು ಉಪಯೋಗಿಸಿದ್ದ ವೀಲ್ ಚೇರ್’ನ್ನು ಅರ್ಹರಿಗೆ ತಲುಪಿಸುವುದಕ್ಕಾಗಿ ನೊಂದಾಯಿಸುವ ಮೂಲಕ ಈ ಯೋಜನೆಗೆ ಚಾಲನೆ ನೀಡಿದ್ದಾರೆ.
`ಕುಟುಂಬದವರ ಅನಾರೋಗ್ಯದ ವೇಳೆ ಖರೀದಿಸಿದ ವೈದ್ಯಕೀಯ ಸಲಕರಣೆಗಳು ನಂತರ ಉಪಯೋಗಕ್ಕೆ ಬರುವ ಸಾಧ್ಯತೆ ಕಡಿಮೆ. ಅಂಥವುಗಳನ್ನು ಅಗತ್ಯವಿದ್ದವರಿಗೆ ತಲುಪಿಸುವ ಉದ್ದೇಶದಿಂದ ಈ ಪರಿವಿಡಿ ರಚಿಸಲಾಗಿದೆ’ ಎಂದು ಗಣಪತಿ ನೀಲಕಂಠ ಪಟವರ್ಧನ್ ಪ್ರತಿಷ್ಠಾನದ ಅಧ್ಯಕ್ಷೆ ರಕ್ಷಾ ಪಟವರ್ಧನ ತಿಳಿಸಿದರು. `ಸುಸ್ಥಿತಿಯಲ್ಲಿರುವ ಉಪಕರಣದ ಹೆಸರು, ಫೋನ್ ನಂ’ನ್ನು ಪುಸ್ತಕದಲ್ಲಿ ನಮೂದಿಸಿದರೆ ಆ ಕೆಲಸ ಮುಗಿಯಿತು. ಆ ಉಪಕರಣವನ್ನು ಎಲ್ಲಿಯೂ ತಲುಪಿಸಬೇಕಾಗಿಲ್ಲ. ಅಗತ್ಯವಿದ್ದವರು ಡೈರಿ ನೋಡಿ, ಫೋನ್ ಮಾಡಿ ಉಪಕರಣವನ್ನು ಪಡೆಯಲಿದ್ದಾರೆ’ ಎಂದವರು ವಿವರಿಸಿದರು.
`ಅಗತ್ಯವಿದ್ದವರು ಆಸ್ಪತ್ರೆ ಸಮಯದಲ್ಲಿ ಬಂದು ಲಭ್ಯ ಉಪಕರಣದ ಮಾಹಿತಿ ಪಡೆಯಬಹುದು. ಫೋನ್ ಮೂಲಕ ಮಾಹಿತಿ ನೀಡುವ ವ್ಯವಸ್ಥೆಗಳಿಲ್ಲ. ಯಾವುದೇ ಪ್ರತಿಫಲಾಪೇಕ್ಷೆ ಇಲ್ಲದೇ ಉಪಕರಣ ಅವಶ್ಯವಿರುವ ರೋಗಿಗಳಿಗೆ ಸಲಕರಣೆ ನೀಡುವ ಉದ್ದೇಶದಿಂದ ಈ ಯೋಜನೆ ರೂಪಿಸಲಾಗಿದೆ’ ಎಂದವರು ಹೇಳಿದರು.
