ಜೊಯಿಡಾದ ಕುಗ್ರಾಮಗಳಲ್ಲಿ ಒಂದಾದ ಅಣಶಿಯ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ಅಮೆರಿಕದ ಡಾಲರ್ ಲೆಕ್ಕದಲ್ಲಿ ದುಡ್ಡು ಬಂದಿದೆ.
ಅಲ್ಲಿನ ಶಿಕ್ಷಕಿ ಅಕ್ಷತಾ ಕೃಷ್ಣಮೂರ್ತಿ ಅವರು ಬರೆದ `ಇಸ್ಕೂಲು’ ಪುಸ್ತಕ ಓದಿದ `ಅಮೇರಿಕಾ ಹರಟೆ ಕಟ್ಟೆ’ಯ ಕನ್ನಡಿಗರು 125 ಡಾಲರ್ (10500ರೂ) ಹಣವನ್ನು ಶಾಲೆಗೆ ಕಳುಹಿಸಿದ್ದಾರೆ. ಈ ಶಾಲೆಯ ಮಕ್ಕಳ ಜೊತೆಗಿನ ಸಂವನ, ಕಲಿಕೆಯ ಸವಾಲುಗಳ ಬಗ್ಗೆ ಟೀಚರ್ ಹೇಳುವ ಕಥೆಯನ್ನು ಆ ಪುಸ್ತಕ ಒಳಗೊಂಡಿದೆ. ಆ ಪುಸ್ತಕ ಓದಿ ಶಾಲೆಗೆ ಈವರೆಗೆ 3 ಲಕ್ಷಕ್ಕೂ ಅಧಿಕ ಹಣ ದಾನಿಗಳಿಂದ ಬಂದಿದೆ. ಅದರಂತೆ ಪುಸ್ತಕ ಓದಿದ ಬೆಂಗಳೂರಿನಿ ಇಂಜಿನಿಯರ್ ಸಂಜಯ ಎಂಬಾತರು ಶಾಲೆಗೆ ಭೇಟಿ ನೀಡಿದ್ದು, ಅಮೆರಿಕಾಗೆ ಹೋದ ಅವರು ಅಣಶಿ ಶಾಲೆ ಬಗ್ಗೆ `ಹರಟೆಕಟ್ಟೆ’ಯಲ್ಲಿ ಹೇಳಿದ್ದರು. ಅಲ್ಲಿ ಪುಸ್ತಕದ ಬಗ್ಗೆ ಚರ್ಚೆ ನಡೆದಿದ್ದು, ಅಲ್ಲಿನವರು ಡಾಲರ್ ಲೆಕ್ಕದಲ್ಲಿ ದುಡ್ಡು ಕಳುಹಿಸಿದ್ದಾರೆ.
ಈ ಡಾಲರ್ ದುಡ್ಡು ಬಳಸಿ ಶಾಲೆಗೆ ಹೊಸ ಖುರ್ಚಿ ಖರೀದಿಸುವುದಾಗಿ ಶಿಕ್ಷಕಿ ಅಕ್ಷತಾ ಹೇಳಿಕೊಂಡಿದ್ದಾರೆ. ಇದುವರೆಗೆ ಶಾಲೆಗೆ ಬಂದ ಅನುದಾನದಿಂದ ಡಿಜಿಟಲ್ ಬೋರ್ಡ್ ಸೇರಿ ಹಲವು ಸೌಲಭ್ಯ ಕಲ್ಪಿಸಲಾಗಿದೆ. ಇಲ್ಲಿರುವ ಗೃಂಥಾಲಯದಲ್ಲಿ 4 ಸಾವಿರಕ್ಕೂ ಅಧಿಕ ಪುಸ್ತಕಗಳಿವೆ. ಇನ್ನೂ ದಾಂಡೇಲಿ – ಅಣಶಿ ಸಂರಕ್ಷಿತ ಅಭಯಾರಣ್ಯಕ್ಕೆ ಪ್ರವಾಸಕ್ಕೆ ಬಂದಿದ್ದ ಪೋಲ್ಯಾಂಡ್ ದೇಶದ ಎಲಿಜೆಬೆತ್ ಹಾಗೂ ಮ್ಯಾಸಿಜ್ ದಂಪತಿ ಅಣಶಿ ಶಾಲೆಗೆ ಭೇಟಿ ನೀಡಿದಾಗ ಇಲ್ಲಿರುವ ಪುಸ್ತಕ ರಾಶಿ ನೋಡಿ 2 ಸಾವಿರ ರೂ ನೀಡಿದ್ದರು. ಒಂದು ಬರಹದಿಂದ ಶಾಲೆಗೆ ಇಷ್ಟೊಂದು ನೆರವು ಬರುತ್ತಿರುವ ಬಗ್ಗೆ ಶಿಕ್ಷಕಿ ಅಕ್ಷತಾ ಹರ್ಷ ವ್ಯಕ್ತಪಡಿಸಿದ್ದಾರೆ.
